Vuálgáh-uv olgoenâmáid?

Olgoenâmáid vyelgim puáhtá vaiguttiđ tuu vuoigâdvuotân finniđ Kela torjuid. Jis mij mäksip tunjin torjuid tâi tust lii eurooplâš pyecceetipšokorttâ, tun koolgah almottiđ mijjân tuu olgoenâmáid vyelgimist.

Mii vaaigut toos, ete puávtáh-uv finniđ Kela torjuid?

Čuávuvááh ääših vaigutteh toos, puávtáh-uv finniđ Kelast torjuu:

• äigi, mon tun lah olgoenâmijn
• eennâm, kuus tun moonah
• suijâ olgoenâmáid vyelgimân.

Jis tun ááiguh maccâđ Suomân tâi tun poorgah Suomâst, tun puávtáh finniđ Kela torjuid koskâpuddâsii olgoenâmijn aassâm ääigi.

Jis tun varriih olgoenâmáid pisovávt, tun jieh innig paste finniđ Kela torjuid.

Mon kuhháá já mon enâmist tun oroh?

Tot, mon kuhháá tun oroh já mon enâmân tun vuálgáh, vaaigut tuu vuoigâdvuotân finniđ torjuid. Mij árvuštâllâp jyehi äššigâs tile ain tábáhtus mield.

Tun finniih täärhib tiäđu torjui mäksimist olgoenâmáid kela.fist tâi ko suáitáh mijjân.

Koskâpuddâsávt olgoenâmijn

Koskâpuddâsávt olgoenâmijn orroom ääigi tun puávtáh táválávt finniđ Kela torjuid. Mij pyehtip juátkiđ jo mieđettum torjuu mäksim tunjin. Tun puávtáh talle meid uuccâđ uđđâ torjuid Kelast.

Motomáid torjuid kuittâg vaaigut uccâ-uv orroom olgoenâmijn. Taah láá

• áigápuátutoorjâ
• paarnij päikkitipšo toorjâ.

Pisovávt olgoenâmijn

Jis tun varriih olgoenâmáid pisovávt, tun jieh táválávt paste finniđ Kela torjuid. Áášán ij vaaigut tot, mon enâmân tun varriih.

Torjui mäksim nohá varrimpiäiván.

Ko tun lah almottâm mijjân vyelgimist, mij árvuštâllâp tuu almottâs vuáđuld, ete varriih-uv tun olgoenâmáid aassâđ koskâpuddâsávt vâi pisovávt.

Merikoskâsávt olgoenâmijn

Jis tun oroh olgoenâmijn merikoskâsávt mutâ jis mij árvuštâllâp, ete tun aasah pisovávt Suomâst, tun puávtáh finniđ Kela torjuid.

Merikoskâsávt olgoenâmijn orroom uáivild ovdâmerkkân tom, ete tun lah iäláttuvâst já aasah ain tälviv 4 mánuppaje olgoenâmijn já maacah kiđđuv Suomân.

Mii lii suijâ tuu olgoenâmáid vyelgimân?

Uáppáásm tärhibeht, maht tuu tilán vaaigut, jis tun vuálgáh olgoenâmáid

• pargen tâi pargo-occen
• uáppen
• iäláttuvfinnejeijen
• perruujesânin.

Tun puávtáh varriđ tâi vyelgiđ olgoenâmáid meid eres suujâi tiet. Jis tust láá koččâmušah, puávtáh väldiđ mijjân ohtâvuođâ.

Almoot mijjân tuu vyelgimist

Almoot mijjân tuu vyelgimist MuuKelast vâi mij pastep árvuštâllâđ, ete pyehtip-uv juátkiđ tuu torjui mäksim.

Almoot tállân vyelgidijnâd, ko

• tun lah olgoenâmijn paijeel 3 mánuppaje já finniih Kela torjuid tâi tust lii eurooplâš pyecceetipšokorttâ
• tun finniih áigápuátutorjuu já lah olgoenâmijn paijeel 7 peivid
• tun algâttah mon peri kukkosii pargokoskâvuođâ nube EU- tâi Eta-enâmist, Sveeicist tâi Stuorrâ-Britanniast
• tun oroh olgoenâmijn merikoskâsávt já váldu-uási ääigist, ovdâmerkkân 1–6 mánuppaje häävild, já Kela máksá tunjin torjuid.

Jis tun jieh pyevti kevttiđ MuuKela, te vuolgât ucâmuš poostâ peht Kelan. Vuorkkii luámáttuv Varrim olgoenâmáid tâi porgâm olgoenâmijn Y 38smn (pdf) jieijâd piergâsân já teevdi tom vuorkkim maŋa. Vuolgât printtejum luámáttuv já lahtosijd čujottâsân Kela, PL 10, 00056 KELA.

Almoot mijjân ain meid, jis tuu eellimtiileest tábáhtuveh nubástusah. Täärhist, maht tuu eellimtile nubástus vaaigut tuu eres Kela torjuid.

Mušte almottiđ meid Digi- já aalmugtiätuvuáhádâhân olgoenâmijn vyelgimist (dvv.fi, suomâkielân).

Uáppáásm sosiaaltorvosopâmuššáid enâmij kooskâ

Uáppáásm sosiaaltorvosopâmuššáid enâmij kooskâ já EU-enâmáid kyeskee lahâaasâtmân (Tietoa Kelasta -uási). Jis tun lah vyelgimin Australian, Quebecân tâi Israelân, seelvât Kelast jieijâd vuoigâdvuođâ pyecceetiipšon.