Nuppi olbmo fápmudahttin Kela-áššiid dikšumii
Jos leat 18 jahkásaš dahje boarrásut, sáhtát addit nuppi olbmui lobi elege fápmudahttit su dikšut Kela-áššiid du beales. Fápmudahtton olmmoš galgá leat uhcimustá 18 jahkásaš. Sáhtát maiddái fápmudahttit máŋga eará olbmo. Fápmudusa sáhttá geassit eret goas beare.
Sáhtát bargat fápmudusa čuovvovaš vugiin:
- Váldegirjjiin sáhtát fápmudahttit dikšut Kela-áššiidat telefovnnas, bálvalanbáikkis ja poastta bokte.
- Suomi.fi-fápmudusain sáhtát fápmudahttit dikšut Kela-áššiidat neahtas MuKelas.
Amma fuopmášat, ahte áibbas buot áššiid ii sáhte vel dikšut MuKelas. Jos háliidat, ahte nubbi olmmoš sáhttá dikšut Kela-áššiidat neahtas ja telefovnna bokte, atte sihke Suomi.fi-fápmudusa ja váldegirjji.
Ná fápmudahtát váldegirjjiin
Váldegirjjiin sáhtát fápmudahttit dievasahkásaš olbmo dikšut Kela-áššiidat telefovnnas, bálvalanbáikkis ja poastta bokte. Jos háliidat, ahte nubbi olmmoš sáhttá dikšut áššiid maiddái neahtas, ovdamearkan ohcat ovddu du beales MuKelas, don galggat addit sutnje Suomi.fi-fápmudusa.
Mearridat ieš, maid áššiid váldegirjjiin sáhttá dikšut. Sáhtát addit nuppi olbmui lobi dikšut buot ovdoáššiidat dahje dušše dihto ovddu dahje ášši. Jos háliidat, ahte fápmudahtton olmmoš dikšu du beales dušše ovtta ovdui laktáseaddji áššiid, čále váldegirjái ovddu nama, ovdamearkan ealáhatoažžu ássandoarjja.
Váldegirjjiin sáhttá maiddái váidalit mearrádusas du beales. Jos barggat váldegirjji Kela skoviin, dasa galgá čállit, ahte váldegirji lea váidalanášši dikšuma várás. Sierra váldegirjji ii goittotge dárbbaš bargat, jos seamma olmmoš lea dikšon seamma ášši váldegirjjiin ovdal.
Váldegirjjiin fápmudahtton olmmoš sáhttá oažžut áššiid dikšuma várás vealtameahttun čiegusin dárkkuhuvvon dieđuidat, jos leat váldegirjjiin addán miehtama dieđuid addimii.
Sáhtát bargat váldegirjji skoviin Váldegirji – Ovdoáššiid dikšun Kelas VAL 3sme (pdf) Loga dárkilut rávvagiid skovi deavdimii: Nuppi beales áššedikšun – Rávvagat váldegirjeskovi deavdimii (pdf).
Don sáhtát bargat váldegirjji maiddái friijahápmásaččat. Friijahápmásaš váldegirjjis galget leat
- doarvái dieđut fápmudeaddji ja fápmudahtton olbmo dahje olbmuid dárkilastima várás
- dieđut das, maid áššiid fápmudus guoská
- dieđut das, oažžugo fápmudahtton olbmui addit áššiid dikšuma várás čiegusin dárkkuhuvvon dieđuid fápmudeaddji birra (lobi sáhttá addit ovdamearkan ovdodieđuid ja eará ekonomalaš sajádaga guoski dieđuid dahje dearvvasvuođadili guoski dieđuid addimii)
- fámusorrunáigi (doaisttážii dahje mearreáigái)
- beaivemearri sihke fápmudeaddji vuolláičálus ja namačielggasmahttin.
Sáhtát doaimmahit váldegirjji MuKelas, poastta bokte dahje bálvalanbáikái. Fápmudahtton olmmoš sáhttá doaimmahit váldegirjji poastta bokte dahje bálvalanbáikái. Fápmudahtton olmmoš ii goittotge sáhte sáddet váldegirjji du beales MuKelas.
Ná doaimmahat váldegirjji MuKelas:
- Deavdde skovi Váldegirji - Ovdoáššiid dikšun Kelas VAL 3sme (pdf) dahje čále friijahápmásaš váldegirjji.
- Vurke váldegirjji iežat reidui dahje váldde das gova.
- Sádde váldegirjji čuovusin.
- Vállje Sádde čuvvosa Eará Kela-áššit-Eará čuvvosat ja Váldegirji. Lavtte váldegirjji ja deaddil Sádde.
Váldegirjji ii dárbbaš vuolláičállit, jos sáddet dan MuKelas iežat dovddaldagaiguin.
Sáhtát goas beare rievdadit váldegirjji fámusorruma dahje geassit eret du addin fápmudusa. Don it dárbbaš muitalit siva dasa, manin geasát eret váldegirjji. Almmut eretgeassimis MuKelas teakstasániin, poastta bokte dahje riŋgemiin min telefonbálvalussii.
Ná fápmudahtát Suomi.fi-fápmudusain
Jos háliidat addit nuppi olbmui fápmudusa dikšut Kela-áššiid iežat beales MuKelas, atte sutnje Suomi.fi-fápmudusa, man namma lea Sosiaaliturvan etuusasioiden hoitaminen (Sosiáladorvvu ovdoáššiid dikšun). Suomi.fi-fápmudus guoská buot Kela-áššiid, elege dan ii sáhte ráddjet dušše dihto áššiid dikšumii.
Suomi.fi-fápmudusain ii sáhte dikšut áššiid nuppi olbmo beales telefovnnas, bálvalanbáikkis iige poastta bokte. Jos háliidat, ahte nubbi olmmoš sáhttá dikšut du Kela-áššiid maiddái ovdamearkan telefovnnain, don galggat addit sutnje váldegirjji.
Amma fuopmášat, ahte áibbas buot áššiid ii sáhte vel dikšut MuKelas nuppi olbmo beales.
Ná attát Suomi.fi-fápmudusa Kela-áššiid dikšumii nuppi olbmui
Sáhtát addit nuppi olbmui álkimusat fápmudusa ieš Suomi.fi-neahttabálvalusas. Fápmudusa addimii leat maiddái eará molssaeavttut. Dán siidui leat čohkkejuvvon rávvagat iešguđetlágan molssaeavttuin.
Jos dus leat elektrovnnalaš sisačálihanreaiddut, dego báŋkodovddaldagat dahje mobiilasihkkarastin, sáhtát addit fápmudusa nuppi olbmui Suomi.fi-fápmudusain.
- Atte bálvalusas dan olbmo dieđuid, gean háliidat fápmudahttit dikšut áššiid du beales.
- Vállje fápmudusa Sosiaaliturvan etuusasioiden hoitaminen (Sosiáladorvvu ovdoáššiid dikšun) ja meroštala dasa fámusorrunáiggi.
- Dárkkis du addin dieđuid ja nanne fápmudusa.
Lassidieđut fápmudusa addimis: Atte áššiiddikšunfápmudusa persovdnan (suomi.fi, suomagillii).
Du lagaš olmmoš sáhttá bivdit fápmudusa Kela-áššiid dikšumii Suomi.fi-neahttabálvalusas. Fápmudusa namma lea Sosiáladorvvu ovdoáššiid dikšun. Don galggat dohkkehit lagaš olbmo bivdaga, vai dan sáhttá rievdadit fápmudussan, mii lea fámus.
Sáhtát dohkkehit fápmudusbivdaga ovdamerkan Suomi.fi-neahttabálvalusas dahje Digi- ja álbmotdiehtodoaimmahaga bálvalanbáikkis (DVV, suomagillii).
Lassidieđut fápmudusbivdaga bargamis: Bivdde áššiidikšunfápmudusa persovdnan (suomi.fi, suomagillii).
Jos dus ii leat elektrovnnalaš sisačálihanreaidu, itge sáhte fitnat sisačáliheamen DVV:a bálvalanbáikkis, sáhtát addit fápmudusa fápmudusohcamušain.
Fápmudusohcamuša gávnnat neahtas: Ohcamušain fápmudahttin (suomi.fi, suomagillii).
Dárkilut rávvagat leat muitaluvvon DVV:a neahttabálvalusas: Ná fápmudahtát, jos it sáhte geavahit elektrovnnalaš bálvalusaid (suomi.fi, suomagillii).
Suomi.fi-fápmudus lea fámus fápmudusa addima oktavuođas meroštallon áigge. Sáhtát maiddái geassit eret elege fámohuhttit fápmudusa (suomagillii) gaskan fámusorronáigge.